Voor literatuur moeten wij een Middeleeuws-Nederlandse lied vertalen, ik weet niet of iemand hier goed in is anders graag wat hulp
Duckdalve ben ick gheheeten,
Een Man van booser aert:
Veel had ick my vermeten,
Mijn Naem was wijdt vermaert:
Ghelijck een Wolf die Schapen bewaert
So had icks oock verbeten,
Tis elck gheopenbaert.
Over al gingh ick setten
Mijn Spangiaerts hier int Landt,
De Duytschen te verpletten
Met Sweert en oock met Brandt:
Bruyckt ick niet een quaet verstant,
Mijn Sweert dat ginck ick wetten
Op die Edelste van het Lant.
Nu wast soo verre ghecomen,
Ick had mijn best ghedaen,
Vrijmoedich sonder schromen
So deed ick een vermaen,
Den thienden Penninck wou ick ontfaen
Dit hebben sy vernomen,
Sy ghinghen my wederstaen.
Fortuyn die liep my teghen,
Dat seg ick u goet rondt,
Ick en haddet niet vercreghen
Het ghene daer ick na stondt,
Dit werck brocht my heel inden grondt,
Och had ick stil ghesweghen,
Dat waer ons seer ghesont.
Een werck sachmen brouwen ,
Ten Briel en daer ontrent,
Zeelant ofte der Gouwe,
Noorthollant wel bekent,
Hoewel de Prins noch was absent,
Sy worden hem ghetrouwe,
Haer hert was van my ghewent.
Raedt, Monicken ende Papen,
Tis qualick met ons ghestelt,
Och had ick doch gheslapen,
En ghy behouden u ghelt:
Wy hebben ons beyden so seer ghequelt,
Niemant en past op ons gapen
Want daer wordt schriftuere vermelt.
Nu noch ten alderlesten
Worde ick gheset ter leur,
So coemt my uit den Westen
Een nieuwe Gouverneur,
Met nieuwe Placaten, met nieuwen keur
Dus raet my nu ten besten,
Waer vind ick een open deur.
Aylacen in alle hoecken
Maeck ick die luyden gram:
Niemant en sal my soecken
Te Bruessel of tAmsterdam,
Om dat ick veel ghelts te leen daer nam
Daerom sy die ure daer vervloecken,
Dat ick in tNederlandt quam.
Nu moet ick weder gaen decken
Na Spaengien, al ist my swaer,
Veel sullen my beghecken,
Die anderen maken misbaer,
Ick nammer so menigen man van daer,
Om na Brabant te trecken,
Seer weinich breng icker tot haer.
Dit antwoort sal ick gheven,
Ist dat my yemant vraecht, De gheen die niet en leven,
Die zijn te laet beclaecht,
Veel zyn der swinters van coude gheplaecht,
Die ander int Velt ghebleven,
Haer leven met strijdt ghewaecht.
Oorlof is best ghenomen, Al eert nu valt te laet,
Ducx macht hem wel beromen
Dat hy is uut die gaet:
Tis wonder wat daer voor handen staet:
Spangiaerts ghy mocht wel schromen Ghy verwacht een cleyne baet